Ag Tiomáint Sa Sneachta

Daoibhse nach bhfuil ceaptha ag an sneachta, ach atá ag tiomáint sa sneachta, b'fhéidir go mba mhaith libh súil a chaitheamh ar an méid atá le rá ag Noel Sweeney ó Swilly Drive anseo, 'a few tips on driving in the snow', dar leis.

Ní dochar bheith ar an eolas, a léitheoirí, mura bhfuil an t-eolas agaibh cheana, ar ndóigh.

Mo chuimhne, níor thug mé faoi deara, go dtí inniu, nach raibh na naisc ag bun mo bhlagmhíreanna ag obair, agus tá aiféala orm faoi sin. Mar is eol daoibh, táim fós ag foghlaim.

Pé scéal é, tá caoi curtha agam ar an bhfadhb anois, agus is féidir, más mian libh, mo bhlagmhíreanna a roinnt ar Facebook, Twitter srl, ach brú ar an gcnaipe ‘Roinn’, nó brú ar cheann de na cnaipí eile sin in íochtar.
.

Say Cheesey

A bhuí le trácht ar ábhar eile, nach mbaineann ar chor ar bith leis an ábhar seo, trácht a d’fhág Dennis ar bhlag Dhubhaltaigh maidir le Twitter Lit, tháinig mé ar an liosta seo, The 50 Worst Inventions, ag bun an leathanaigh sin ar time.com.

Bhuail uafás nach beag Síog nuair a thaispeáin mé físeán an Pet Spa dó, agus táim beagnach cinnte gur chuala mé na focail ‘dual amadáin!’ uaidh nuair a chonaic sé an Snuggie for Dogs.

Blianta ó shin, fuair mé an CueCat, saor in aisce, ó mo dheirfiúr i mBostún, ach níor bhain mé úsáid riamh as. ‘Nuff said, mar a deir an Béarla.

Maidir leis na ‘Phone Fingers’, níor chuala mé iomrá riamh orthu, agus ní nach ionadh. Cuirim iadsan, Farmville, agus Venetian Blind Sunglasses isteach i gcatagóir ar leith. An bhfaca mé na focail ‘style morons’ nó 'utterly pointless and functionless accessory' scríofa áit éigin san alt sin ar an idirlíon?

Níor bhain mé féin úsáid as Crocs, ná as Hair in a Can riamh, cé go nglacaim leis go bhfuil daoine ann a bhainfeadh, agus a bhaineann. Tá an ceart sin acu. Níl aon dlí ina n-aghaidh, agus ní dóigh liom gur diamhasla atá iontu, ach an oiread. Ceapaim.

Ní cheapaim go gcuirfeadh na Subprime Mortgages aon ‘smile’ ar éadan an Dubhaltaigh, ná ar éadan go leor daoine eile sa tír seo, ach an oiread. Maidir le Clippy, chuir an diabhal sin mise ar mire go mion minic thar na blianta, cé go gcaithfear a admháil go raibh ‘smile’ deas ag an gcréatúr.

Go deimhin, más mian leat anailís a dhéanamh ar do ‘smile’ féin, a léitheoir, is dócha go bhféadfá fios a chur ar bhogearraí ón tSeapáin, agus do Smile Check féin a dhéanamh chuile mhaidin...;-)
.

Crystal Swing

Tá go leor cainte faoin ngrúpa ceoil, Crystal Swing, na laethanta seo.

Seo thíos físeán uatha, físeán nár tugadh mórán airde air mí ó shin, gan ach 600 amas ar youtube an t-am sin, ach le beagnach 200,000 amas air le mí anuas.

Tá Ellen DeGeneres ag twitteráil fúthu, deirtear, agus beidh siad le feiceáil ar an Late Late an Aoine seo chugainn, más fíor.

Ó tharla go dtugaim an nuacht is tábhachtaí, ahem, chugaibh chomh minic agus is féidir liom, ná bíodh sé le rá agaibh nach raibh sibh ar an eolas faoin scéal seo.



.