Na Fir Chiúine In Philadelphia

Tá sé de nós agam dhul isteach i siopaí carthanachta ó am go chéile. Is maith liom tacú leo, agus is minic a fhaighim nithe éagsúla don teach, nó fiú dom féin, istigh iontu.

Tharla sé gur shiúil mé isteach i gceann acu trí mhí ó shin, agus shantaigh mo shúil an pictiúr thuas. Thit mé i ngrá leis ar an bpointe, fiú sular thug mé faoi deara nach prionta de phictiúr a bhí ann, ach olaphictiúr. Cheannaigh mé ar an ‘ardaigh orm’ é.

Cibé scéal é, ní ba dhéanaí sa lá, bhí mé i mo shuí sa bhaile ag breathnú ar mo phictiúr álainn, nuair a thug mé faoi deara go raibh sé sínithe ag duine darbh ainm ‘Danny Carmody’.

Rinne mé googláil ar an ainm, agus tháinig mé ar scéal an fhir seo, Gaillmheach a d’imigh ón saol seo i 2004, gan an fear bocht ach 45 bliain d’aois.

Rinne mé tuilleadh taighde agus, a bhuí le Brian Whelan, ealaíontóir a raibh aithne aige ar Danny, agus a d’aithin ‘stíl’ Danny ón bpictiúr den olaphictiúr a chuir mé chuige, fuair mé fianaise uaidh a dheimhnigh gurb é Danny, go deimhin, a shínigh m’olaphictiúr.

Anois tá olaphictiúr fhear na Gaillimhe ar bhalla tí bhean seo na Gaillimhe. Tá a bhaile aimsithe aige. Go mba hé don ealaíontóir.

Daoibhse thall in Philadelphia, más mian libh tuilleadh den obair álainn a rinne Danny, agus a chomhghleacaithe Brian Whelan, Dermot Holland, John Duffin agus Bernard Canavan, a fheiceáil, beidh an taispeántas ‘The Quiet Men’, le feiceáil sa Villanova Art Gallery ón 20ú lá den mhí seo go dtí an 6 Deireadh Fómhair.

Tá taispeántas ealaíne le Brian Whelan le feiceáil i Sasana ag an Holt Summer Festival Exhibition anois, é ar siúl ansin go dtí an 15ú den mhí seo, le taispeántas eile uaidh ag an Thompson’s Summer Show ón 4-29 Lúnasa.
.