Vása agus Clog

An rud a thug mé faoi deara faoi cheardlanna scríbhneoireachta, a léitheoirí, ná go dtagann siad idir mise agus codladh na hoíche. Ní roimh an gceardlann a tharlaíonn sé sin, an dtuigeann sibh, ach ina diaidh.

Feictear dom go mbíonn ábhar na ceardlainne ag teacht abhaile liom, é ag dul timpeall i mo chloigeann, mar a déarfá; tobsmaointe ag líonadh m’inchinncheall le hábhar nua scríbhneoireachta. Idir dheireadh na ceardlainne agus am luí ar an lá, ní bhíonn stop leis na smaointe cruthaitheacha.

Aréir, tar éis cheardlann an lae inné, bhí creatlach scéil ag croitheadh a chnámha ar chluasa m’aigne ar feadh na hoíche, rud a d’fhág nach bhfuair mé mórán codlata. Go hiondúil, is cuma liom má tharlaíonn a leithéid oíche Shathairn, ó tharla Domhnach leisciúil romham lá arna mhárach, go minic; ach ní raibh a leithéid de Dhomhnach romham inniu, faraor.

Pé scéal é, vása ba chúis le m’easpa codlata. Sea. Vása. Ceann a bhris, a dúradh linn. Agus, bean a bhris é. Áit éigin. Am éigin. Fágadh fúinn féin na sonraí uilig a líonadh isteach. Leathuair a tugadh dúinn don chleachtadh sin ag an gceardlann. Obair phinn chruthaitheach a bhí ann, agus ba shuimiúil na torthaí uaidh.

D’fhoghlaim mé go leor ón gceardlann i nDoire inné, agus thug mé creatlach scéil abhaile liom ón gcleachtadh leathuaire sin. Sea, creatlach scéil na gcnámh challánach sin a tháinig idir mé féin agus codladh na hoíche aréir.

Faraor, bhí éirí luath romham ar maidin. Faraor eile, bhí mo chlog róghar do mo mhéar, méar a mhúch an clog sula raibh jab an chloig críochnaithe aige, rud a d’fhág bean seo na méire mire deireanach ag éirí. Thit mé i mo chodladh arís, an dtuigeann sibh.

Aidhm an scéil seo atáim ag roinnt libh, a léitheoir? Más rud go bhfuil éirí luath romhat, agus méar mhear agat atá róghar do do chlog, b’fhéidir gurbh fhiú duit ceann acu seo a cheannach.
.

Lá Éalaithe Áine

Ó bhí an histireachtóime agam ceithre mhí ó shin, tá m’fhuinneamh laghdaithe go mór. Ach, mar a scríobh mé anseo, ní mar a chéile a bhíonn aon lá.

Ar laethanta, bím breá ábalta mo chosa a chur fúm, agus aghaidh sách láidir fuinniúil a thabhairt ar an saol. Lá Éalaithe Áine a thugaim ar na laethanta sin. Bíonn laethanta eile ann, mar a tharla Lá Fhéile Pádraig, mar shampla, agus caithim an lá i mo luí ar an tolg, ag fanacht le filleadh m’fhuinnimh.

Ach, is cuma. Nílim tinn ar chor ar bith, an dtuigeann sibh. Ar Lá an Toilg, mar a thugaim air, níl ann ach go bhfuilim ag cneasú, agus táim ag láidriú chuile lá.

D’éirigh liom, an tseachtain seo caite, mar shampla, am a chaitheamh ag Éigse Cholm Cille, ach, an tseachtain seo, níor éirigh liom mo bhealach a dhéanamh chuig Éigse an Spidéil. Cé gur mhian liom a bheith ann, ní raibh m’fhuinneamh flaithiúil liom, agus sin sin, mar a déarfá. Beidh lá eile ag an bPaorach.

Ach, faraor géar, níor tháinig laghdú ar mo ghoile, agus tá sé agam chomh maith céanna agus a bhí riamh. De thoradh sin, tá an fuinneamh, nach bhfuilim in ann a ídiú, ag dul glan díreach isteach i gcealla geire mo cholainne. Dá réir sin, ahem, tá mo bholg ag méadú. Sea.

‘I hope I don’t put on any more weight!’ arsa mé féin leis an nGarraíodóir inné, agus mé ag breathnú orm féin, agus ar mo bholg ach go háirithe, sa scáthán.

Tháinig fear na n-ilbharróg i mo threo, chuir a dhá lámh timpeall orm, agus dúirt, ‘You’re not getting bigger, pet. It’s just that my arms are getting shorter!’

Hmmm…
.

Éigse An Spidéil

Bhí an t-ádh liom anuraidh gur éirigh liom oíche nó dhó a chaitheamh ag Éigse an Spidéil.

Roinn mé dán nó dhó ag 'Cúirt na hÉigse' ann, agus bhain mé sult nach beag as an gcomhluadar, agus as an gcraic.

Comhghairdeas le Deirdre Nic Chonaonaigh, agus lena comhghleacaithe, as an gclár iontach atá curtha le chéile acu i mbliana.

Seo chugaibh clár na n-imeachtaí, a léitheoirí, agus más rud go bhfuil an t-ádh libh agus go mbeidh deis agaibh bheith ann, b'fhéidir go gcloisfeadh sibh dán nó dhó liom ag Cúirt na hÉigse...

Déaɼdaoin 18 Máɼta
Óstán na Páiɼce
• 7.30 i.n: Oscailt na hÉigse
Éigse 2010 á seoladh
• Léacht
‘Máirtín Ó Direáin: idir dhá chladach’
An Dochtúir Mairéad Conneely
• Léamh Filíochta
Filíocht Mháirtín Uí Dhireáin dá cur i láthair
Aisteoirí an Spidéil
• Seoladh Leabhair
Máirtín Ó Direáin: na Dánta
Cnuasach nua, á fhoilsiú ag Cló Iar-chonnacht
• Cúirt na hÉigse
Oíche fhilíochta
Filí áitiúla
• 10.30 i.n: Seisiún
Colm Gannon, Kelly Geraghty & Mick Conneely

Dé hAoine 19 Máɼta
Óstán na Páiɼce (Táille €10)
• 8.00 i.n: Taispeántas Damhsa
Sean-nós na hÉireann
Seosamh Ó Neachtain & damhsóirí áitiúla
Ceol le Johnny Óg Connolly
Luascdhamhsa Mheiriceá
Galway Swing
Salsa Cubana Chúba
Dance Project
• 10.00 i.n: “Agus Rud Eile dhe”
Foinn & filíocht
Ronan Browne (píobaire) & Louis de Paor (file)
Tiġ Hughes
• 10.30 i.n: Seisiún
Johnny Óg Connolly & cairde

Dé Saṫaiɼn 20 Máɼta
Óstán na Páiɼce
• 10.00 r.n - 1.00 i.n: Máistir-ranganna & ceardlanna
(Táille €15)
An bosca ceoil
An fheadóg mhór
An fhidil
An consairtín
• 12.00: Comórtas Cuimhneacháin
Pheatsaí Uí Cheannabháin
Comórtas amhránaíochta do dhaoine
faoi bhun 18 mbliana d’aois
Corn RTÉ Raidió na Gaeltachta
Ceaɼdlann an Spidéil
• 3.30 i.n: Blogam fíona agus plaic sa mBuilín Blasta
Fliuchadh do ghoib & cur is cúiteamh!
• 4.00 i.n: Taispeántas Ealaíona i Stiúideó Rob d’Eath
Comaoin: ealaíon is péintéireacht le
Catherine Patricia Fleming
Á sheoladh ag Tadhg Mac Dhonnagáin
Óstán na Páiɼce
• 8.00 i.n: Coirmcheol mór na hÉigse (Táille €10)
Oliver Deveney (bosca ceoil) &
Geraldine King (giotár)
Róisín Elsafty
Siamsóirí an Acadaimh
• 10.30 i.n: Seisiún
Ceoltóirí áitiúla

Dé Doṁnaiġ 21 Máɼta
Tiġ Hughes
• 12.30 i.n: Comóradh Tom Pháidín Tom
Ócáid amhránaíochta do dhaoine fásta
Connie Ó Gallchóir
Pádraic Tom Photch Ó Ceannabháin
Carthach Mac Craith
• Clabhsúr na hÉigse
Ceoltóirí, damhsóirí & amhránaithe áitiúla

Imeaċtaí Bɼeise
Teaċ na Cúiɼte
• Taispeántas Ealaíona
Seán Ó Flaithearta:
léaráidí Máirtín Ó Direáin: na Dánta
An deireadh seachtaine ar fad
Óstán na Páiɼce
• Taispeántas Leabhar
Foilsitheoirí Cheantair Chonamara
Tráthnóna Déardaoin amháin

Tuilleaḋ eolais
• Deirdre Nic Chonaonaigh
091 553 124
deirdrenic@gmail.com
.

Éigse Cholm Cille

Mar eolas daoibh, a chairde, féach an preasráiteas thíos.

Téama na hÉigse: 'An Greann sa Ghaeilge'

Coláiste Mhig Aoidh, Doire

An Aoine, 5ú agus an Satharn, 6ú Márta 2010

'Léiríonn teidil na gcainteanna d'Éigse Cholm Cille 2010 go bhfuil féith an ghrinn i gceantar Cineál Eoghain, mar ab fhearr aithne air go stairiúil, beo bríomhar i gcónaí.

Ar phríomhphearsana an ghrinn san fhichiú haois tá Brian Ó Nualláin nó 'Myles na gCopaleen' mar is fearr aithne air, arbh as ceantar Cineál Eoghain dó.

Pléifear féith dheisbhéalach an ghrinn i ráisteachas Shéamuis Uí Ghrianna sa chaint 'Séamus Ó Grianna agus an Bletherin' Bitch Syndrome' mar aon le plé ar imeartas focal sna canúintí Gaeilge, i measc nithe eile, sa chaint dár teideal 'Greann and bear it'.

Is léir ó ábhar na gcainteanna go dtéann traidisiún an ghrinn i bhfad siar sa Ghaeilge agus deir Shaw gurbh í aimsir thais na hÉireann ba chúis le flúirse an ghrinn. Ar ndóigh eascraíonn feiniméin chultúrtha dá leithéid ó fhréamhacha cultúrtha, agus is iad fréamhacha cultúrtha an ghrinn sa Ghaeilge a bheidh mar ábhar na comhdhála seo.

Beidh 'súil siar' á caitheamh ar ghnéithe stairiúla na haoire agus na ndánta Ultacha, taobh le 'súil eile' á caitheamh ar an ghreann comhaimseartha anuas go ré TG4.

Cuirfear tús leis an chomhdháil le caint ón bhfile cáiliúil, Liam Ó Muirthile, agus le dráma grinn ó Aisteoirí áitiúla Ros Guill oíche Aoine, 5 Márta 2010 ag 7.30 i.n. Beifear ag súil le greann, mar aon le neart plé grinn i rith na hÉigse ar an Aoine agus ar an Satharn.'
.