Ar Mhuin na Muice Mímhacánta

Bhí an t-ádh leis an nGarraíodóir inniu, mar bhuaigh sé duais airgid ón International Lotto Commission, duais ar fiú €915,810.00 í! Tá muid saibhir! Wú Húúúúúúúúú

Sea.

Ar ndóigh, bhí a fhios againn, ar an bpointe boise, gur camscéim a bhí sa litir a tháinig tríd an bpost ar maidin, chomh luath agus a chonaiceamar an seoladh ar an gclúdach litreach. Bhí an seoladh air díreach mar an gcéanna leis an seoladh a bhí ar an gceann seo a tháinig an mhí seo caite, foinse seoltaí de shaghas éigin ar fáil dóibh, is cosúil.

Maidir leis an litir féin, litir dála na litreach atá luaite anseo, bhí an chuma uirthi go raibh an dúch sa phrintéir beagnach ídithe, agus bhí sé deacair an dea-scéal bréagach a léamh, cé go raibh na focail ‘AWARD NOTIFICATION’ breá soiléir.

Bhí an dara leathanach breá soiléir, freisin, an ‘CLAIM PROCESSING FORM’, agus duine ar bith a mbeadh sé de mhí-ádh air an fhoirm sin a líonadh isteach, a chuid sonraí pearsanta a roinnt, agus iad a sheoladh ar ais chuig an seoladh luaite, ní dóigh liom go bhfeicfeadh sé pingin rua, ach, seans, go gcaillfeadh sé pingin nó dhó.

Tháinig mé ar an suíomh seo ar maidin, agus cheapfainn gur fiú súil a chaitheamh ar an leathanach seo, le tuiscint a fháil ar mhodh oibre na scéiméirí seo, agus ar an leathanach seo, go bhfeicfidh sibh liosta na ‘legitimate lotteries’, dar leo.

Bígí ar bhur n-aire, a léitheoirí.
.