An Bhfuil Ceann Agat?

Tharla sé go raibh an Colm and Jim-Jim Breakfast Show ar siúl nuair a chas me an raidió air ar maidin. Ní clár é lena n-éistim go hiondúil, ach éistim le Gerry Ryan, agus é ag scagadh nuacht na bpáipéar ag a naoi a chlog chuile mhaidin, agus bhí mé ag fanacht leis-sean nuair a chuala mé iadsan.

Cibé scéal é, bhí ábhar faoi chaibidil acu a chuir bás m’athar i gcuimhne dom. Cé nach raibh baint ar bith ag an ábhar le bás m’athar, bhain an t-ábhar leis an bpíosa airgead reatha 20p, píosa d’airgead a tháinig ar an saol an bhliain chéanna a bhásaigh m’athair, 1986. Bhuel, sin mar a cheap mé, ar aon nós. Is cuimhin liom, ar theacht abhaile dom ón tsochraid i Meiriceá, sóinseáil a fháil in Aerfort na Sionainne, agus píosa 20p ann, rud nach bhfaca mé riamh cheana.

Ach, is cosúil, ón méid a chuala mé ón mbean a bhí ar chlár Choilm agus Jim-Jim ar maidin, go raibh ‘trial production’ ann i 1985, go bhfuil cuid acu fós áit éigin, iad ‘escaped’ mar atá scríofa anseo. Cibé scéal é, tá luach €10,000, nó mar sin, ar cheann acu anois, dar leis an mbean ar an gclár, a hainm Liom Ní Cuimhin.

Ó tharla mé de shíor bhur gcoinneáil ar an eolas faoi rudaí tábhachtacha, ahem, cheap mé gur mhaith libh an scéal seo a chloisteáil, freisin, ar fhaitíos ceann éalaithe i bhfolach áit éigin sa teach agaibh, i ngan fhios daoibh, an dtuigeann sibh.

An bhfuil ceann agat?
.

Wee Willie Blinkers

Tá mé ag éisteacht leis an gcraic faoi Willie le seachtain anuas agus an bhfuil a fhios agaibh, a léitheoirí, ach táim den bharúil go bhfuilim ag dul as mo mheabhair!

An é go bhfuil gach duine a chaith vóta tacaíochta sa Duh’all an lá úd i ndáiríre den bharúil go raibh Jimí A. Mac Easmocheann agus Liom Ní Cuimhin i gcomhluadar Wee Willie Blinkers nuair a shínigh sé an cháipéis dlí sin?
.

Eolach?

‘Experience is what you get when you don’t get what you want.’ a chuala mé ón bhfear, a ainm Liom Ní Cuimhin, ar chlár Mharion ar maidin, cé go gceapaim go raibh an fear seo ag labhairt, agus gurbh é an Irish Glass Bottle Site a bhí faoi chaibidil aigesean ar chlár éigin. Ní raibh mé ach ag leath-éisteacht, an dtuigeann sibh.

Bíodh mé ceart nó mícheart faoi sin, tá a fhios agam go ndúirt Oscar Wilde ‘Experience is the name everyone gives to their mistakes.’, agus níl dabht ar bith i mo chloigeann beag suarachsa ach go ndearna tógálaithe na tíre seo neart acu sin, agus gur chuidigh na bainc, agus polaiteoirí na tíre leo, ar bhealach an-aineolach, cheapfá. Feachtas fiáin chun rachmais a bhailiú a tharla, shílfeá, i ngan fhios do na rialtóirí airgeadais, is cosúil.

Dúirt Albert Einstein ‘The only source of knowledge is experience’, agus feictear domsa go raibh na daoine sin, na daoine a bhí in ainm a bheith ina sources of knowledge agus experience againne, agus a híocadh go maith ar son an knowledge agus experience sin, feictear dom go raibh siad iomlán aineolach. Nó dall. Nó ag leath-éisteacht, cosúil liomsa.

.